|
«Лекциі лемківского языка» будут поділены на три части:
- І част – буквы, єст перезначена для тых, котры не знают лемківской азбукы, а хотіли бы ся єй навчыти. Знаме, же може не буде то легкє, але думаме, же вартат!
- ІІ і ІІІ част - скєруваны сут до вшытких, котры хтіли бы звекшыти своє знаня на тему лемківской граматыкы, пошырити свій, особистий словник лемківского языка о новы слова, або заступити денекотры польонізмы часто уж забытом лемківском лексиком.
Знаме, же напевно дуже з Вас буде мало застережыня, што до формы, слів ци запису, зато одраз упереджаме – лекциі роблени сут на основі трьох джерел. Перше то: «Граматыка лемківского языка» авторства проф. Т. Фонтаньского і мгр М. Хомяк, друге «Cловник лемківско-польскій, польско-лемківскій» Я. Хорощака, а третє то занятя з практичного вчыня лемківского языка на «Лемківскій філологіі». На тій підставі творены сут вшыткы три часты лекций.
Маме надію, же сподабат ся Вам спосіб, в якій переказаты хочеме тото знаня. Денекотры неолоґізмы можут до вас не трафляти. Як мате інчы думкы – пиште, што дві головы то не єдна! Коли дахто ма можливіст підзвідати бабу ци діда, або памятат якісы слова, о котрых сме забыли, просиме о дополніня лексикальной части. То уж остатня хвиля, жебы выратувати стары, лемківскы слова !
Варвара & Олена Дуць – Краків, 12.2005р.
„Lekcyi lemkivskoho jazyka” budut podileny na try czasty:
- I czast – bukvy, jest pereznaczena dla tych, kotry ne znajut lemkivskoj azbuky, a chotily by sia jej navczyty. Zname, z’e moz’e ne bude to lehkie, ale dumame, z’e vartat!
- II i III czast – skieruvany sut do vszytkych, kotry chtily by zvekszyty svoje znania na mez’u lemkivskoj hramatyky, poszyryty svij osobystyj slovnyk lemkivskoho jаzyka o novy slova, abo zastupyty denekotry polonizmy czasto uz’ zabytom lemkivskom leksykom.
Zname, z’e napevno duz’e z vas bude malo zasterez’ynia, szto do formy, sliv cy zapysu, zato odraz uperedz’ame – lekcyi robleny sut na osnovi trioh dz’erel. Persze to „Hramatyka lemkivskoho jazyka” avtorstva prof. T Fontanskoho i mgr. M. Chomiak, druhe „Slovnyk lemivsko-polskij, polsko-lemkivskij” J. Horoszczaka, a tretie to zaniatia z praktycznoho vczynia lemkivskoho jаzyka na „Lemkivskij filolohii”. Na tij pidstavi tvoreny sut vszytky try czasty lekcyj.
Mame nadiju, z’e spodabat sia Vam sposib, v jakij perekazaty choczeme toto znania. Denekotry neologizmy moz’ut do Vas ne traflaty. Jak mate inszy dumky – pyszte, szto dvi holovy to ne jedna! Koly dachto ma moz’lyvist pidzvidaty babu cy dida, abo pamitat jakisy slova, o kotrych sme zabyly, prosyme o dopolninia leksykalnoj czasty. To uz’ ostatnia chvyla, z’eby vyratuvaty stary, lemkivsky slova.
Varvara & Olena Duć – Krakiv, 12.2005r. |
