6 листопада 2011р. в Театрі ім.Ю.Остервы в Ґожові В. мало місце великє выдаріня - президент Польщы Броніслав Коморовскій одзначыл о.Артура Ґрабана Срібрным Крестом Заслугы за діяня на річ охороны, плеканя і розвияня достоменности культуровой меншын народовых і етнічных.

 

Одзначыня вручыл воєвода любускій Ян Свірепо підчас XIX Стріч з культуром лемківском, де выступувал м.ін. Лемко Товер Юніор зо Стшелец Край. котрий провадит Олег Смолей.

Є то друге так важне одзначыня о.Ґрабана - поперднє отримал од міністра культуры Міхала Уяздовского за діяня на річ охороны забытків, а докладні, за перепроваджыня ґенеральных ремонтів костелів в Бжозі і Луґах.

О.Артур Ґрабан - православний духовний, катехета, учытель  лемківского языка, парох парафіі пп.Архангела Михала в Бжозі і парафіі пп.Успеня Богородиці в Луґах. Реактивулал і зареєструвал Стоваришыня Любителів Культуры Лемківской в Стшельцах Край. Помыслодавця і орґанізатор вельох лемківскых імпрез такых як нп. Лемківска Ватра в Луґах, Вечер з Лемківском Культуром, Стрічы Трьох Культур. Заложытель і кєрівник ансамблю Лемко Товер, котрий награл пят платни і дал понад 2000 концертів в Польщы і поза єй границями.

З його іницятивы выремонтувано костел в Луґах (XIX ст.) і в Бжозі (XIII ст.), в котрім додатково повстал іщы найбільший каноничний іконостас в західній Польщы. Завдякы його стараньом перенято і выремонтувано будинок старой вежы тиснінь, в котрій одбывают ся лемківскы стрічы і котра служыт тіж яко осередок стоваришыня і ансамблю Лемко Товер. О.Ґрабан є вспілтворціом і редактором книжок о лемківскій тематыці, м.ін. цыклю книжок "З лемківской скрині" ци альбуму "Іконы православной церкви в Бжозі". Орґанізатор і іницятор вельох проєктів, котрых цілію є культывуваня і плеканя лемківской культуры серед молодежы - парунадцет проєктів того тыпу о назві "Корінний Дім".

за: www.cerkiew.pl

Ґратулюєме і желаме дальшых успіхів!

 

 

« попередня   наступна »